Is prendas
Sa circa fata in Siddi, fata gràtzias a sa disponibilidadi de totus is personas chi tenit a càstiu sa stòria nosta, s’at permitiu de podi biri cali fiant is prendas de sa bidda e a ita serbiant, e a ddas pratziri in tres calidadis: cussas portadas po palla, contras is mazinas o cussas de devotzioni. Unu tempus, is prendas de si ponni po scialai, fiant pagus giai chi s’econòmia de sa genti de innoi, assumancu finas a sa primu perra de su Noixentus, fut agro-pastorali. In prus, sa bidda no at allogau nimancu su bistiri traditzionali ca, su prus de is bortas, est arricau de prendas, chi fitianamenti ndi scerant sa bidda puru.
Pagus is ocasionis anca s’arregallànt prendas, ma sceti chini si ddas podiat permiti: aici, candu nasciat, calincuna pipiedda arriciat is cannixeddas e is pipieddus, calincuna borta, arriciant de is padrinus o de is ajajus, una cadenita fini fini fini. Is piciocas prus assortadas, a s’acabu de sa coja podiant arriciri de su sposu unu bell’aneddu, de imperai sa dii de sa coja puru, deghinou me is famìllias prus arricas, sa sogra a sa nura dd’arregallàt un’arrosariu de prata. Is chi no si podiant permiti is aneddus de coja, si ddus faiant lassai o nd’imperànt àterus chi no sèmpiri fiant de oru, a bortas fiant de prata o de arramini puru. Oi perou, finas me is domus de chini ndi teniat, medas de custas prendas no s’agatant prus, po mori de ddas ai perdias, segadas o arregalladas a sa crèsia comenti promissa.
Is piciocas chi disigiànt de portai prendas, giai chi no si ddu podiant permiti, si cuncordànt cun froris e frutus de matas arestis, chi stampaus e acapiaus a pari cun d-unu filu, fadiant a perlinas po cannacas, bratzalis e arracadas: s’amentant pruschetotu is frutus de piscialetu e coràvigu.
Acapiadas a leis no scritas, ma scipias e arrispetadas de is prus, funt is ainas chi tenint virtudis antigas: corrus de mari (cipree), sonajolus acapiaus a partis de imbirdi, corrixeddus de ossu e de prata, piscixeddus, prus de unu tipu de sabègia, frochixeddu birdi.
Medas de custas contramazinas si funt perdias e bivint sceti me is arregordus de chini ddus at bius portaus o ddus at imperaus po amparai is pipius suus: funt issus is chi, prus de totus is àterus, depint essi amparaus de s’ogu liau, a bortas ghetau, chena de nexi, de sa castiada de fulanu. Po cussu, is mamas, firmant in su coddu de is pipius, cun d-una agulla, una sabègia chi teniat puru unu frochixeddu birdi. A bortas is contramazinas no bastànt e is pipius s’arrendiant; insandus, tocàt a andai a si fai fai sa mexina de s’ogu liau de is fèminas chi nc’arrennesciant. Intra custas, no totus faiant sa mexina a sa pròpriu manera: is fueddus naraus e is matacinnus fatus, su prus, fiant preghieras a is santus cristianus, a sa Madonna e a Gesus, e depiat essi torrau a arripiti po tres diis de sighiu.
Sa mexina no dda faiant sceti a is òminis ma a is pegus e a is matas puru. A is animalis (cuaddus e bois), imperaus po traballai in su sartu, ddis poniant asumancu unu frochixeddu birdi po no ddus liai ogu; sa dii de santu Sidoru su matessi incarrigu ddu teniant is guturadas, de peddi arrandada cun coloris allutus, e is pitiolus.
A tretu de mesu intra maxia e devotzioni cristiana nci funt is scapolàrius, pruschetotu is de sa Madonna de Cramu, oindii puru portaus po s’amparai.
gioielli
costumi
paesi
Crediti