Sa cosa de papai

---

Sa pasta est stètia e sighit a essi, de importu mannu in s’econòmia e in sa traditzioni siddesi: de is annus Cincuanta a is annus Setanta fut abertu su pastificiu “Pasta Puddu” chi at serrau po mori de sa crisi manna, a livellu natzionali, de totu su setori de sa pasta; oi s’Aministratzioni comunali tenit s’intentu de torrai a vida custu fràigu.
Oi puru, sa pasta benit fata in Siddi sighendi is traditzionis: de is tallutzas a is prus nodius marraconis filaus, spaghitus longus e finis traballaus cada unu de is manus abistas de is fèminas de Siddi. Is chi faint parti de sa Comunidadi “Marraconis Filaus” si donant e ita fai po valorizai su sistema sociu-econòmicu de sa bidda, prushetotu po su chi pertocat sa pasta tìpica, sa filera de su trigu, sa ristoratzioni, s’accullentzia, s’artigianau, is servìtzius turìsticus, impari a s’identidadi stòrica, culturali e sociali de su territoriu.
Est in sa manifestatzioni “Appetitosamente”, festa regionali de cosa de papai bona, chi bessint a pillu e s’afortiat sa promotzioni de s’identidadi, de sa memoria, de sa traditzioni, de sa biodiversidadi e de su svilupu eco-sostenibili de su territoriu. Giai chi “Appetitosamente” dd’ant fatu giai una pariga de bortas, est diventau un’atòbiu chi, chini agradessit s’acòrdiu intra sa cosa de papai e sa cultura contadina, anca est arrexinada, no podit perdi. Po tres diis nci funt atòbius, laboratorius, spetaculus, concertus, escursionis, installatzionis, mostras-mercau, proietzionis, colatzionis specialis, degustatzionis e andalas intregadas a sa cosa de papai, chi abratzant sa menti e su s’ànimu. Sa manifestatzioni est apariciada de s’Aministratzioni Comunali e de totu sa popolatzioni, de is associatzionis e de is siendas localis, agiudaus de sa Coperadiva Villa Silli, de sa Comunidadi “Marraconis Filaus”, de Slow Food Sardegna, de su chef Roberto Petza e de su Museu de is traditzioni agroalimentaris de sa Sardìnnia “Casa Steri”.
Un’àteru disafiu po Siddi est s’Accademia de su Gustu, scola po formai chef giovunus, maitre de sala, sommelier, manager de s’acullentzia, chi agiudat a sa formatzioni de is chi produxint in sa filera alimentari, po fai movi un’àtera borta is produtzionis de innoi, po sa nàscida de siendas de ristoratzioni e de aculentzia in su territoriu e sa promotzioni enogastronomicu locali. S’Academia est arricia in “Domu Puddu”, domu manna sinniorili de is primus annus de su Noixentus e oi, de propriedadi de su Comunu de Siddi, anca ddoi at puru su ristoranti S’Apposentu, primu in Sardìnnia in sa Guida de is ristorantis italianus 2012 de su “Gambero Rosso”, dirìgiu de Roberto Petza, chef nodiu in totu su mundu e stedda Michelin.

Torna su