Sa citadi de s’ollu
In Gonnosfanadiga nci funt medas matas de fruta, bìngias, ma pruschetotu matas de olia; nci nd’at chi tenint prus de milli annus. Cun s’editu de is chiudendas (mesi de ladàmini 1820) is prus arricus fiant arrennèscius a si ponni meri de is cungiaus e iant incumentzau a ponni bìngias e matas de olia, fadendi is primas siendas agricolas. Po meda gonnesus, is matas de olia e s’ollu funt un’atividadi econòmica manna. Oi su Comunu de Gonnosfanadiga, chi tenit una traditzioni manna in custu setori, fait parti de s’Associatzioni “Citadi de s’ollu” e s’ollu suu est stimau in totu s’ìsula e no sceti in sa regioni nosta.
Funt casi dexi is siendas chi imbutilliant, doxi is chi produxint olias cunfitadas. Innoi s’imperat un’olia particolari, sa “niedda de Gonnos”, fata cun acua de mitza e sali. In domu de su professori Teobaldo Bardi, a su n. 1 de bia Verdi, est allogau beni e cun amori un’antigu molinu; fut de Antoni, ajaju suu, chi in su 1890, po primu, nd’at pesau su primu laboratòriu po traballai s’olia e fai s’ollu. Su molinu, si podit bisitai po sa sagra de s’olia, chi si fait po donniasanti, e arregistrat dònnia annu giai 25.000 bisitadoris. Me is tres diis de sa sagra, si podit tastai su chi benit produxu, cosa de papai tìpica cundia cun ollu bonu e pani arridau cundiu cun ollu nou e, in prus, si podint bisitai is molinus antigus e cussus nous de sa bidda. Benint fatus puru cuvennius, mostras, cuncursus e sa presentazioni de su bandu “Concorso Regionale Olio Nuovo”; is arresurtaus de custu, benint donaus in martzu, in sa manifestazioni aprontada de su Comunu de Gonnosfanadiga, de s’ERSAT e de su Consòrtziu interprovinciali po sa cultura de sa fruta, chi permitit de connosci e premiai sa calidadi de s’ollu de olia.
Torna sugioielli
costumi
paesi
Crediti