prendasdesardegna.it
prendasdesardegna.it
Arresojas

Arresojas

Arresojas est stètia sa primu e prus manna festa de su gorteddu artigianali sardu; in su 1995, annu de sa primu editzioni, esistiant in Sardìnnia sceti duas biddas– Pattada e Santulussurgiu – chi iant apoderau sa traditzioni de su gorteddu artigianali; oindii, est s’ùnica parti de s’artigianau chi est crescendi sèmpiri tanti chi, giai in dònnia bidda, oi ddoi est unu chi fait gorteddus e is mostras mercau funt sèmpiri de prus.


Arresojas si scerat de is àteras mostras de gorteddus po sa punna a sa cultura e a sa stòria de su gorteddu; chi in àterus logus est giai tropu chi pinnicat a pari unus cantu de maistus de gorteddus, in Guspini, custu no bastat: a parti is mannus maistus de gorteddus Giampaolo Cancedda, anomingiau “Furitto”, Giorgio Malacri e is Fradis Puggioni, de Guspini etotu, acantu a is mannus maistus sardus comenti Barore, Tonino, Antonio e Piero Fogarizzu, is Fradis Salaris, Paolo Calaresu o Tore Puddu, po ndi nai una pariga, ant pigau parti a Arresojas, amostendi is traballus insoru, maistus mannus italianus comenti Francesco Pachì, Paolo Scordia o Santino Balestra e internatzionalis comenti Larry Fuegel, Steve Hoel o Ron Lake. Unus cantu de custus ant fatu puru laboratòrius de formatzioni e dimostratzionis pùblicas de sa traballa dura de s’aciaiu damasco: arregordaus cussus de Santino Balestra, Paolo Calaresu o Alexandre Musso. Duncas Arresojas at fatu sa parti sua – intzullendi a su cunfrontu cun is prus mannus artigianus – in sa crèscida professionali e culturali de is medas maistus de gorteddus chi ant pigau parti a is mostras suas.
Ma no sceti custu. In dònnia editzioni acanta de is mostras de is traballus de is artigianus, benint cuncordadas mostras chi pertocant circas storica e etnogràficas, comenti “De sa pedra de tronu a s’arresoja”, “Sa lepa, s’atza de is sardus”, “Atzas de Europa”, “Su stili italianu” o “Atzas de su mundu”; Arresojas at fatu e sighit a fai sa parti sua me in sa connscèntzia e sa stòria de su gorteddu artigianali, in Sardìnnia, in Italia, in su mundu. Chi custu no bastat, Arresojas minescit una bisita puru po su logu ùnicu e bellu meda anca si fait: is menas de Montevecchio. Me is logus chi unu tempus aculliant sa mena de prumu e zincu prus manna de s’Europa, innantis de essi fatus Museu de sa mena, is mostras de Arresojas funt stètias aprontadas in Gennas (oi Montevecchio) in su Palatzu de sa diretzioni de is menas o me is spàtzius mannus meda de cussus chi fiant is Cantieris de Levanti.
Dònnia dus annus, intra su mesi de argiolas e de austu, a pagus chilòmetrus de sa costa ocidentali, Arresojas bosi abetat.

Torna su
prendasdesardegna.it

Crediti