prendasdesardegna.it
prendasdesardegna.it
Is museus "Domus"

Is museus "Domus"

Is sforzus de is aministratzionis comunalis de Guspini po cunverti s’economia e sa cultura de sa bidda no s’est impunnada sceti a is menas ma pertocant inderetura sa bidda giai chi ant pigau fràigus stòricus e nci ddus ant cambiaus a museus, in d-unu percursu urbanu tzerriau “Domus” e chi est aìnturu de su Parco culturale Giuseppe Dessì. A progetu acabau, nc’ant a essi cincu museus alliongiaus intra issus chi ant a permiti su bisitadori de connosci mellus e de sèmpiri de sa realtadi stòrica de su chi si produxit in sa bidda, siat cosa de papai ca artigianau.


Si movit de su fràigu chi unu tempus culliate su Monti Granàticu. Su Monti Frumentàriu o Monti Granàticu de Guspini est nàsciu in su 1686. Nodiu cun su nòmini de su magasinu de su monti, serbiat po lassai su trigu de semenai a is messajus chi no ndi teniant, tirendiddus a su perigulus de is agangadoris. In càmbiu, chi arriciat su prestidu s’impenniat a traballai po debadas me is terras de sa Crèsia.
In custu fràigu, in su 2010, ant abertu a primu borta su Monte Tempo ca, definiu “museu enciclopedicu de Guspini”, tocat totu sa stòria e sa cultura materiali de su guspinesu cunfrontadas cun is pròprius eventus e temas de su mundu. Su bisitadori passat de unu tempus a s’àteru: su Tempus de sa Pratza, su Tempus Lìberu, su Tempus de su viàgiu, su Tempus de sa cosa de papai, de sa domu, de sa mena, de su traballu, de sa guerra, de is lotas… Monte Tempo arregallat su tempus chi allogat gràtzias a is contus scritus e contaus, amostendi fotografias de insandus e de oi, torrendi a fai manifestus e documentus stòricus.

Pagu aillargu ddoi est Casa Murgia, una domu campidanesa de s’otuxentus fata a làdiri chi fut de genti cun terra meda, chi oi est cuncordada a Museu de su binu e de s’ollu. Me is tres pranus, si podint mirai is atividadis de su territòriu, pruschetotu cussas chi tenint e ita biri cun is bìngias e is olias, e si podint pigai puru is cosas bonas produxas innoi. In su pranu terra, ant torrau a fai is aposentus de una dòmu cun sa coxina, su salotu e, intrendu de sa corti, su magasinu de su binu. In su pranu apitzus, invecias, is atividadis de is bìngas e de is olias funt amostadas sighendi is tèmporas de s’annada agricula; ainas e panellus acrarant su traballu de sa semena a s’incùngia a su prodotu fatu.

Is àterus fràigus, giai arrangiaus ma de acabai de cuncordai, funt Casa Agus–Atzeni, casa a corti chi, cun is murus de làdiri, sa pratza a impedrali e sa lolla chi partit de su portali mannu de linna, amostat comenti fiant is fràigus in su guspinesu e at a diventai su Centru de documentatzioni e museu de s’arti de su ferru e su gorteddu; is Domus a corti, unus cantu de domus de làdiri chi tenint is spàtzius pretzius a segunda de is traballus agriculus chi depiant aculli, ant a essi su Centru de documentatzioni e museu de is atividadis alliongiadas cun is abis e su casu e su Molinu Garau, imponenti impiantu elètricu po molli su lori, imperau de is guspinesus de is annus Coranta finas a is annus Setanta, chi at a essi Centru de documentatzioni e museu de is atividadis alliongiadas cun su lori.

Torna su
prendasdesardegna.it

Crediti