prendasdesardegna.it
prendasdesardegna.it
Is museus

Is museus

Su museu etnograficu Is lollas de is ajajus
Su museu etnograficu Is lollas de is ajajus est in d-una domu de su Setixentus, chi fut de sa famìllia Marongiu-Landis. Abertu su 5 de austu 2005, apustis de dda ai arrangiada, sa domu museu amostat sa domu antiga de is messajus cun is aposentus de sa tradizioni locali: s’aposentu de crocai, sa lolla de su trellaxu, sa coxinedda, su magasinu de su binu, sa lolla de is ainas, sa lolla de su forru e, puru, unu logu po is traballus antigus e is ainas de donniunu: su maistu de muru, su maistu de linna, su sabateri, de su brabieri e de su ferreri.
Su museu est aìnturu de su cumplessu de Sant’Antonio de su fogu de su sèculu doxi; de pagu ant agatau asuta de sa pratza e de sa crèsia, unu tretu de bia romana. A faci de su cumplessu medievali su merì de su 16 de gennaxu s’afestat su Santu cun d-unu su fogadoni.

Sa butega de tziu Giuannicheddu
Su primu museu privau de Mandas ddu ant abertu su 28 de maju 2011. Sa famìllia Secchi, meri de sa domu, at arrangiau sa domu de su babu, donendi atentzioni meda a sa butega de su babu, sa butega de su ferreri – logu meda importanti po sa bidda. Contant ca tziu Giuannicheddu, cun su traballu suu, at fatu cresci s’economia de sa bidda. S’idea chi ant tentu, at permìtiu a totus de connosci unu arti bella e antiga, e de pinnicai is ainas chi ddoi fiant in butega.
Sa butega est piticheddedda, una lolla sceti in sa pratza, pretzia de sa domu, chi s’afaciat in sa bia prus manna, bia Casteddu. Podeus mirai su forru de su ferreri, fatu de làdiri cun sa parti de asuba de ferru, e su chi s’abruxàt po callentai su ferru de arretundai. Podeus biri s’achicaiu po stinconai su fogu, e totus is ainas de traballu: sa foddi, s’incùdini, is tanallas po fogu, is mateddus, is mallus; in prus, ddoi funt sa mesa de traballu, sa prentza e àteras ainas.

Museu de arti sacra Peregrinatio Fidei: su camino de Santiago
Su museu est in su cumplessu de su Sescentus, anca ddoi est puru sa Crèsia de Santu Cristolu, su cunventu de is Paras e sa Crèsia de Santu Franciscu.
Sa Crèsia de Santu Cristoli o de Sa Madonna de’Arrosariu, acanta a sa crèsia parrochiali, ndi-dda ant pesada in su sèculu dexeseti. Su logu po pregai fut ùnicu cun tres arcadas e sa bòvida de linna; arriciat sa cunfraria de s’Arrosariu e cussa de Madonna d’Itria, sparessias totus e duas.
Me is aposentus de sa Crèsia ant abertu, su 7 de gennaxu 200, su museu de arti sacra Peregrinatio Fidei: su caminu de Santiago, in onori de Santu Iacu, patronu de Mandas. Aìnturu de su museu funt allogadas stàtuas intintas chi funt de is primus annus de su Sescentus (castia Is Cresias, is santus e is contus) e is cosas de prata de su sèculu sexi e dexenoi chi funt su scussorgiu de sa crèsia.

prendasdesardegna.it

Crediti